Thursday, March 24, 2016

Aprende Konaba Partisaun Iha GNU/Linux (Parte 2)

Antes aplika saida maka iha mata-dalan ne'e, esperadu backup hotu dadus ou dokumentus importante iha Ita-Bo'ot sira nian komputador ou laptop.
Iha mata-dalan "Aprende Konaba Partisaun Iha GNU/Linux (Parte 1)" esplika ona konaba partisaun, tipu partisaun, komparasaun tabela partisaun entre Windows ho Linux, no seluk-seluktan.

Kontinuasaun husi parte rua ne'e sei foka liu ba pratika, oinsa atu kria no resize partisaun utiliza aplikasaun Gnome Partition Editor (GParted).

Notas:
Pratika ne'e Autores uza Linux Mint 7.1 ne'ebe hala'o husi Live DVD. Default pakote aplikasaun GParted disponivel iha sistema operasaun refere. Jeralmente distro derivadu husi Debian ou Ubuntu iha ona GParted. La haluha mos, hard disk foun ho kapasidade 120 Gigabyte utilizadu para kria mata-dalan ne'e.

Kria Partisaun GNU/Linux
Hanesan ho saida maka Autores mensiona iha mata-dalan parte dahuluk, minimu tenki aloka partisaun rua para instalasaun sistema operasaun Linux:

1. partisaun Swap
2. partisaun / (root)

Atensaun:
Wainhira atu komesa kria no aloka partisaun ba sistema operasaun Linux, Autores fo hanoin para le'e fila-fali referensia husi mata-dalan parte dahuluk.

Lalaok hanesan tuir mai ne'e:
  • Loke aplikasaun GParted liu husi Menu: Administration → GParted

    Hala'o Aplikasaun GParted Husi Mint Menu

  • Sei mosu janela aplikasaun GParted hanesan ilustrasaun iha kraik ne'e, nomos automatikamente GParted sei detekta hard disk ne'ebe iha.

    Janela Prinsipal Aplikasaun GParted

  • Kria uluk partisaun Swap liu husi menu: Partition → New. Bele mos ho dalan korta, utiliza butaun CTRL + P iha keyboard.

    Hahu Kria Partisaun

  • Hatama numeru "1024" iha New size (MiB) no hili "linux-swap" iha combo box File system. Karik hakarak hanaran partisaun refere, bele ense iha opsaun Label. Kontinua hili butaun Add.

    Kria Partisaun Swap

    Notas:
    Montante minimu kapasidade ne'ebe Autores alokadu ba partisaun Swap total = 1024 Megabyte (MB), signifika hanesan ho 1 Gigabyte (GB). Jeralmente, alokasaun 1024 MB / 1 GB ba partisaun Swap sufisiente ona para bele kumpri kriteria instalasaun sistema operasaun GNU/Linux.

  • Ho maneira hanesan momentu halo partisaun Swap iha leten, kria partisaun / (root) husi kapasidade hard disk restu ne'ebe iha.  

    Kria Partisaun / (root)

  • Depois aloka kapasidade hard disk ba kada partisaun, klik ba butaun "Apply All Operations" para bele aplika mudansa partisaun hirak ne'e permanente.

    Aplika Mudansa Partisaun

  • Sei mosu janela konfirmasaun. Hili butaun "Apply" para kontinua.

    Janela Konfirmasaun

  • Prosesu eskrita ba tabela partisaun komesa la'o.

    Prosesu Eskrita Partisaun

  • Kuandu mosu janela informasaun hanesan ilustrasaun iha kraik ne'e, signifika prosesu kriasaun partisaun la'o ho susesu. Klik butaun "Close" para taka janela refere.

    Kompletu Kria Partisaun

  • Resultadu husi prosesu hotu hanesan ezemplu ilustrasaun tuir mai ne'e.

    Resultadu Partisaun

    Notas:
    Ita bele kria partisaun /home ketak husi partisaun prinsipal (root) ho maneira ne'ebe hanesan wainhira kria partisaun root. Depende hakarak alokasaun montante hira husi kapasidade hard disk ne'ebe iha. Ezemplu ilustrasaun husi resultadu alokasaun ketak partisaun /home hanesan iha kraik ne'e.

    Resultadu Partisaun /home Separadu Husi Partisaun / (root)
Kria Partisaun GNU/Linux Husi Hard Disk Ne'ebe Ezisti Ona Windows
Wainihira hakarak instala sistema operasaun GNU/Linux ba iha hard disk ne'ebe ezisti ona sistema operasaun Windows ho nune'e bele disponivel sistema operasaun rua (Dual OS) iha hard disk ida, pasu dahuluk tenki identifika uluk lai partisaun ne'ebe disponivel kapasidade hard disk ho espasu bo'ot (bele uza GParted). Depois bele resize partisaun refere no hahu kria partisaun bodik ba instalasaun sistema operasaun GNU/Linux.

Maneira oinsa resize partisaun hanesan tuir mai ne'e:
  • Booting Linux Mint 7.1 husi DVD, depois loke aplikasaun GParted.

    Hard Disk Ho Partisaun Sistema Operasaun Windows
    Notas:
    Iha ilustrasaun leten, hard disk refere eziste ona partisaun Windows ho filesystem NTFS. Partisaun ne'ebe disponivel espasu livre no seidauk utilizadu  (Unused) husi /dev/sda5 total 86.56 GB. Espasu partisaun /dev/sda5 ne'e ita sei resize no kria sai partisaun bodik ba instalasaun GNU/Linux.

  • Klik ba iha partisaun /dev/sda5, no hahu resize partisaun liu husi menu: Partition → Resize/Move.

    Hahu Resize Partisaun /dev/sda5

  • Deslizamentu no muda rama tutun husi liman los ba liman karuk ho mouse para hetan espasu livre tuir nesesidades. Iha pratika ne'e Autores sei aloka 31 GB. Bele mos resize partisaun diretamente ho maneira digitandu montante partisaun ba opsaun Free Space  Following (MiB). Kontinua klik ba butaun "Resize / Move" para bele aplika mudansa resize partisaun refere.

    Resize Partisaun Windows

  • Ho maneira hanesan momentu kria partisaun GNU/Linux iha inisiu, kria partisaun Swap no / (root) husi kapasidade hard disk ne'ebe resize ona. Ezemplu husi resultadu ilustrasaun kraik ne'e, kapasidade 31 GB ne'ebe hetan husi resultadu resize partisaun /dev/sda5, Autores aloka ba partisaun Swap (1 GB) no / (30 GB).

    Resultadu Husi Resize no Kria Partisaun

    Notas:
    Karik hakarak kria mos partisaun /home, bele aloka espasu husi resultadu resize partisaun /dev/sda5. Ezemplu iha pratika ne'e, Autores aloka partisaun bodik ba Swap (1 GB), / (20 GB) no /home (10 GB) rezultadu tomak hanesan iha ilustrasaun tuir mai ne'e.

    Ezemplu Husi Resultadu Kria Partisaun /home Separadu
    Wainhira aloka no aplika minimu partisaun hanesan ida husi ezemplu iha leten, signifika partisaun preparadu ona no ita bele instala sistema operasaun GNU/Linux ba iha partisaun refere tuir nesesidade.

    Informasaun Adisional:
    Kapasidade hard disk iha kada dispotivu hanesan komputador ou laptop talvez diferente, tamba ne'e wainhira atu pratika saida maka iha mata-dalan nee, presija kuidadu no tenki identifika didiak kontidu partisaun iha hard disk ho nune'e labele salah iha implementasaun no afeita ba dadus ou dokumentus ne'ebe iha hard disk laran.
To'o iha ne'e deit artiklu "Aprende Konaba Partisaun Iha GNU/Linux" parte daruak, espera ne'e bele sai nudar referensia bodik ba belun sira mak hakarak hatene konaba maneira kria no resize partisaun utiliza aplikasaun GParted iha sistema operasaun GNU/Linux.

Referensia:
http://matadalanlinux.blogspot.com
http://avancalinux.blogspot.com
Fahe artiklu ne'e
  • Fahe ba Facebook
  • Fahe ba Twitter
  • Fahe ba Google+
  • Fahe ba Stumble Upon
  • Fahe ba Evernote
  • Fahe ba Blogger
  • Fahe ba Email
  • Fahe ba Yahoo Messenger
  • Seluktan...

Iha komentariu 6

:) :-) :)) =)) :( :-( :(( :d :-d @-) :p :o :>) (o) [-( :-? (p) :-s (m) 8-) :-t :-b b-( :-# =p~ :-$ (b) (f) x-) (k) (h) (c) cheer

 
© Mata Dalan Linux & Software Livre
Designed by BlogThietKe Cooperated with Duy Pham
Released under Creative Commons 3.0 CC BY-NC 3.0
Posts RSSComments RSS
Back to top